Түркістанда екі отбасы трансплантациядан кейін бір күнде ауруханадан шығарылды
Түркістанда екі отбасы ағза трансплантациясынан кейін бір күнде ауруханадан шығарылды. Ұлы анасына бауыр бөлігін, анасы ұлына бүйрек берді.
Сурет: turkystan.kz
Түркістан облыстық клиникалық ауруханасында ағза трансплантациясынан кейінгі емдеу курсын сәтті аяқтаған екі отбасы бір күнде үйлеріне қайтарылды, деп хабарлайды Qazaqtoday.info сайты.
Облыстық денсаулық сақтау басқармасының мәліметінше, бір отбасында ұлы анасына бауырының бір бөлігін берсе, екінші отбасында анасы ұлына бір бүйрегін донор ретінде ұсынған.
Басқарма хабарламасында: «Бір отбасында 20 жыл бұрын анасы ұлына өмір сыйлаған еді. Бүгін сол ұлы анасына бауырының бір бөлігін беріп, жаңа өмірге мүмкіндік сыйлады. Ал екінші отбасында анасы 20 жыл бұрын дүниеге әкелген ұлына бүгін өз бүйрегін беріп, баласына өмірді екінші рет сыйлады», – делінген.
Бауыр трансплантациясы А.Н. Сызғанов атындағы Ұлттық ғылыми хирургия орталығының басқарма төрағасы, профессор, академик Болатбек Баймаханов бастаған мамандардың қатысуымен жасалды.
Денсаулық сақтау басқармасы бұл оқиғаны заманауи трансплантология мүмкіндігінің және дәрігерлер кәсібилігінің нәтижесі деп бағалап, отбасы мүшелерінің бір-біріне деген жанқиярлығы мен сүйіспеншілігі ерекше көрініс тапқанын атап өтті.
