Астанада 12 қабатты тұрғын үйде өрт шықты, үш адам құтқарылды
Астананың Сарайшық ауданында 12 қабатты тұрғын үйдің кабель шахтасында өрт шығып, үш адам құтқарылды. Өрт 27 погон метр аумақта сөндірілді, зардап шеккендер жоқ.
Сурет: Видеодан скриншот
Астананың Сарайшық ауданындағы А-52 көшесінде орналасқан 12 қабатты тұрғын үй кешенінде өрт болды. Төтенше жағдайлар министрлігінің мәліметінше, ғимараттың бірінші қабатынан тоғызыншы қабатына дейінгі кабель шахтасында электр кабелі тұтанған.
Бұл туралы Qazaqtoday.info сайты хабарлайды.
Авариялық-құтқару жұмыстары барысында баспалдақ арқылы үш адам, оның ішінде бір бала құтқарылды. Өрт 27 погон метр аумақта сөндіріліп, жалынның одан әрі таралуына жол берілмеді. Зардап шеккендер жоқ, — делінген хабарламада.
ТЖМ өкілдері өрт белгілері байқалса, дереу 112 нөміріне хабарласу қажеттігін еске салды. Ведомство өрт кезінде лифтіні пайдаланбауға және құтқарушылардың нұсқауларын орындауға шақырды.
