Дастан Сатпаевтің карточкасы АПЛ сайтында пайда болды

Сурет: newtimes.kz

Англия Премьер-лигасының (АПЛ) ресми сайтында қазақстандық 18 жастағы шабуылшы Дастан Сатпаевтің жеке карточкасы жасалды. Футболшының профилінде ол лондондық «Челси» сапында 36-нөмірмен өнер көрсететіні көрсетілген, деп хабарлайды Qazaqtoday.info сайты.

АПЛ сайтында ойыншы профилінің пайда болуы 12 тамызда «Қайрат» түлегінің кәмелетке толуына байланысты. ФИФА-ның кәмелетке толмағандардың халықаралық ауысуын реттейтін ережелері бойынша, дәл 18 жасқа толуы оның ағылшын клубына ресми түрде ауысуын аяқтап, ойыншы деректерін лиганың бірыңғай тізіліміне енгізуге мүмкіндік берді.

Футболшының карточкасында оның азаматтығы (Қазақстан), туған күні (2008 жылғы 12 тамыз), ойын нөмірі (36) және алаңдағы позициясы (шабуылшы) көрсетілген.

Айта кету керек, АПЛ-дың ресми дерекқорына ену Сатпаевтің «Челси» үшін заңды тіркелгенін растайды, алайда бұл оның бүкіл маусымға негізгі құрамда қалатынына автоматты кепілдік бермейді. Жазғы трансфер терезесі жабылғанға дейін «көктердің» бас бапкерлер штабы қазақстандықты не бірінші командада қалдыра алады, не тұрақты ойын тәжірибесін алу үшін оны жалға беру туралы шешім қабылдай алады.

Бұған дейін Сатпаев лондондықтармен маусым алдындағы дайындықтан өтіп, австралиялық «Уэстерн Сидней Уондерерс» клубына қарсы жолдастық кездесуде гол соққан болатын.

Фотограф Митчелл Роджерс жаттығу кезінде клубтың кейбір ойыншыларының суреттерін жариялады. Оның бірінде футболшы Дастан Сатпаев бейнеленген. Жанкүйерлер бұл постқа «Челси» футбол клубына әзіл-қалжың түріндегі түсініктемелер қалдырып, жабыла жазды.