Батыс Қазақстан облысында аудандық Мәдениет үйінің құрылысы тоқтап қалды
Батыс Қазақстан облысында жемқорлыққа қарсы еріктілер Бәйтерек ауданы Щапов ауылында салынып жатқан мәдениет үйі құрылысына мониторинг жүргізді.
ҚР Сыбайлас жемқорлыққа қарсы іс-қимыл агенттігі БҚО бойынша департаментінен мәлім еткеніндей, клуб құрылысына бюджеттен 560 млн астам теңге қаралған.
«Нысанның мердігері – «Отделстрой» құрылыс-коммерциялық фирмасы» ЖШС. Техникалық қадағалауды «Тұран Құрылыс» ЖШС, авторлық қадағалауды «БС Строй холдинг» ЖШС жүзеге асыруда. Мәдениет үйінің құрылысын биылғы желтоқсан айында аяқтау көзделген. Алайда құрылыс алаңындағы қазіргі жағдай бұл мерзімнің бұзылуы мүмкін екендігін көрсетіп отыр. Мониторинг нәтижелері бойынша еріктілер құрылыс қарқынын жылдамдату жөнінде ұсыныстар жіберді», — деп хабарлады ведомстводан.
Бәйтерек ауданы әкімінің орынбасары Мұрат Залмұқанов аталмыш құрылысқа қажетті 271 млн теңгені республикалық бюджеттен бөлу мәселесі қарастырылып жатқанын жеткізді.
«Мәдениет, өнер және спортты қолдау – мемлекет саясатының басым бағыттарының бірі. Осыған байланысты жетекшілік ететін органдар құрылыс барысын ұдайы бақылап, проблемалық мәселелер туындаған жағдайда тиісті шараларды уақтылы қабылдауға міндетті. Біз осы бағыттағы жұмысты алдағы уақытта да жалғастырамыз», — дейді еріктілер.
