Шымкенттегі «Жұлдыз» индустриалды аймағы теміржол желісімен қамтылды
Шымкенттегі «Жұлдыз» индустриалды аймағында ұзындығы 6,4 шақырым тұйықталған теміржол желісінің құрылысы аяқталды. Әкім Ғабит Сыздықбеков нәтижемен танысты.
Фото: пресс-служба акимата города Шымкент
Шымкент қаласындағы «Жұлдыз» индустриалды аймағында өнеркәсіптік кәсіпорындарға қызмет көрсетуге арналған тұйықталған теміржол желісінің құрылысы аяқталды. Бұл туралы қала әкімі Ғабит Сыздықбеков атқарылған жұмыстың нәтижесімен танысу барысында мәлім болды.
Бұл туралы Qazaqtoday.info сайты хабарлайды.
Жаңа теміржолдың жалпы ұзындығы 6,4 шақырымды құрайды. Нысанда теміржол төсемін салумен қатар, асфальт жабыны толық қалпына келтірілген.
Еске сала кетейік, Қазақстан халқына жолдауында мемлекет басшысы Қасым-Жомарт Тоқаев көлік-логистика инфрақұрылымын дамытудың, теміржол желісін кеңейтудің және жүк тасымалының тиімділігін арттырудың маңыздылығын атап өткен болатын. «Жұлдыз» индустриалды аймағында теміржол желісінің салынуы осы міндеттерге сәйкес келеді және қаладағы өнеркәсіптік кәсіпорындардың дамуында аса маңызды.
Жаңа инфрақұрылым шикізат пен материалдарды жеткізуді, дайын өнімді жөнелтуді жеңілдетіп, индустриалды аймақтың логистикалық мүмкіндіктерін кеңейтеді. Сонымен қатар, теміржол өндірістік алаңның әлеуетті инвесторлар үшін тартымдылығын арттырып, жаңа өндіріс орындарын орналастыруға және қаланың өнеркәсіптік мүмкіндігін дамытуға қосымша жағдай жасайды.
