Каспийдегі әскерилердің қаза болуына қатысты қылмыстық іс қозғалды
Каспийдегі әскерилердің қаза болуына қатысты ҚР ҚК 453-бабының 2-бөлігі және 465-бабы бойынша қылмыстық іс қозғалды. Қанат Бозымбаев отбасыларға көмек көрсетуді тапсырды.
Фото: t.me/mangystau_news
Каспий теңізі жағалауындағы оқиғаға байланысты қылмыстық іс қозғалды. Ішкі істер министрінің орынбасары Санжар Әділовтің баяндауынша, Қазақстан Республикасы Қылмыстық кодексінің екі бабы бойынша іс ашылған: 453-баптың 2-бөлігі («Қызметке немқұрайлы қарау, ауыр зардаптарға әкеп соққан») және 465-бап («Кеме жүргізу ережелерін бұзу»). Тергеуді ведомствоаралық жедел-тергеу тобы жүргізіп жатыр, сот сараптамалары тағайындалды.
Бұл туралы Qazaqtoday.info сайты хабарлайды.
Қанат Бозымбаев апаттың барлық мән-жайын қысқа мерзімде анықтап, кінәлілерді жауапкершілікке тартуды тапсырды.
Жиналыста қаза тапқандардың отбасыларын қолдауға ерекше көңіл бөлінді:
«Заң бойынша тиесілі материалдық көмектен бөлек, көмек көрсетуге ниет білдірушілерден көптеген өтініш түсуде. Қазақстан халқы кеңесінің мүшелері қаза тапқандардың отбасыларына материалдық көмек көрсететінін мәлімдеді, олардың бірі әрбір қаза тапқан әскери қызметшінің отбасына 25 млн теңгеден бөлді. Ірі бизнес өкілдерінің бірқатары да материалдық көмек көрсетуге ниет білдірді», — деді Қанат Бозымбаев.
Еңбек министрлігі мен Маңғыстау облысының әкімдігіне бұл қаражаттың адресациясы мен бөлінуінің ашықтығын қатаң бақылау тапсырылды.
Сонымен қатар жиналыс барысында Денсаулық сақтау вице-министрі Манас Рамазанов құтқарылып ауруханаға жатқызылған әскери қызметшінің жағдайы тұрақты деп бағаланып отырғанын, оның өміріне ешқандай қауіп төнбейтінін хабарлады.
Еске салайық, апат 24 қыркүйекте Каспий теңізінің жағалауындағы оқу-жаттығу кезінде болған. Қорғаныс министрлігінің алғашқы ақпараты бойынша, теңізде 19 әскери қызметші болған: тоғызы қаза тапқан, үшеуі құтқарылған (біреуі ауруханаға түскен), қалғандарын іздеу жалғасқан.
Кейін ведомство деректерді нақтылады: Маңғыстау облысындағы оқу-жауынгерлік тапсырма кезінде дауылды желден теңізге 17 адам ағызылып кеткен. Олардың 12-сі қаза тапқан, үшеуі құтқарылған, тағы екеуінің тағдыры әлі белгісіз – іздеу операциясы жалғасуда.
Президент Қасым-Жомарт Тоқаев қаза тапқандардың туыстарына көңіл айтты, 25 қыркүйекте Қазақстанда жалпыұлттық аза тұту жарияланды.
