Дастан Сәтпаев «Бернлиге» жалға берілді: футболшы пікір білдірді

Сурет: egemen.kz

Қазақстандық футболшы Дастан Сәтпаев «Челси» клубынан Англияның «Бернли» командасына жалға ауысуына қатысты пікірін білдірді. 18 жастағы шабуылшы өзінің жеке парақшасында жаңа кезеңге қатысты қысқа жазба жариялады, деп хабарлайды Qazaqtoday.info сайты.

«Бұл – тек бастамасы. Жалға берілу – мені одан әрі шыңдап, күшейте түсетін жаңа тәжірибе. Ең жақсысы әлі алда, иншалла! Алға, Қазақ елі!» деп жазды футболшы.

Бұған дейін «Челси» клубы Дастан Сәтпаевтың команданың ресми ойыншысы атанғанын және алдағы маусымды Чемпионшипте өнер көрсететін «Бернли» сапында жалға өткізетінін ресми түрде хабарлаған еді.

Сәтпаев 12 тамызда 18 жасқа толып, сол күні «Челсимен» келісімшартын ресми түрде рәсімдеді. Қазақстандық футболшының Лондон клубына ауысуы бұған дейін «Қайрат» сапынан келісілген болатын.

Енді Сәтпаев 2026/27 маусымында «Бернли» сапында өнер көрсетіп, Англия чемпионатының екінші деңгейі – Чемпионшипте тәжірибе жинайды. Оның жалға берілуі сатып алу құқығынсыз жүзеге асқан. Сондықтан маусым аяқталғаннан кейін футболшы «Челсиге» оралады деп күтілуде.

Сәтпаевтың жаңа командадағы алғашқы ойыны жексенбі күні «Вест Хэмге» қарсы өтуі мүмкін.