Сурет: kaztag.kz
Мәдениет және ақпарат министрі Аида Балаева «Сергек» бейнебақылау камераларына агрессияны анықтайтын алгоритмдерді енгізу туралы Мәжіліс депутаты Құдайберген Бексұлтановтың сауалына жауап берді. Министрдің айтуынша, елімізде жасанды интеллект технологияларын қолдану арқылы қоғамдық қауіпсіздікті арттыру жұмыстары жүргізіліп жатыр деп хабарлайды Qazaqtoday.info сайты.
Вице-премьер Ішкі істер министрлігінің Ұлттық қауіпсіздік комитетімен және басқа да мүдделі мемлекеттік органдармен бірлесіп Ұлттық бейнемониторинг жүйесін енгізіп жатқанын атап өтті. Бұл жүйе заманауи видеоаналитика мен жасанды интеллект мүмкіндіктерін пайдалана отырып, қоғамдық қауіпсіздік деңгейін арттыруға және оқиғаларға жедел әрекет етуге бағытталған. Жоба аясында ел бойынша 43 мыңнан астам камера жасанды интеллект функцияларымен жабдықталған. Олар адамдардың мінез-құлқын талдайтын 35 түрлі аналитиканы қолданады. Бұл модель төбелес, адамдардың көп жиналуы, қалдырылған заттар, қоқыс тастау және басқа да қоғамдық тәртіпті бұзу фактілерін анықтай алады.
Өңірлер үшін қоғамдық мәдениет индексін енгізуге қатысты Аида Балаева халықаралық тәжірибеде мұндай индекстердің баламалары бар екенін, бірақ олар басқа терминдермен аталатынын түсіндірді. Мұндай индекстер бір ғана көрсеткішпен шектелмей, адамдар арасындағы сенім деңгейі, заңға бағынуға дайындық, волонтерлікке қатысу сияқты бірнеше бағытты қамтиды. Оның айтуынша, «Қоғамдық мәдениет индексін» енгізу зерттеу ұйымдарымен және мемлекеттік органдармен тұжырымдамалық тәсілдерді әзірлеуді талап етеді.
Сонымен қатар, министр білім беру үдерісін жаңғырту аясында орта білім беру ұйымдарында «Адал азамат» бірыңғай тәрбие бағдарламасы енгізілгенін жеткізді. Бұл бағдарлама Мемлекет басшысының «Әділетті Қазақстан – Адал азамат – Озық ойлы ұлт» идеологиялық триадасына негізделген және құндылықтарға бағытталған тәрбие жүйесін қалыптастыруды көздейді. Ал «Таза Қазақстан» жалпыұлттық бастамасы халықтың экологиялық және мінез-құлық мәдениетін, оның ішінде азаматтардың қоғамдық нормаларды сақтауын қалыптастыруға бағытталған.
Зиялы және табысты қазақстандық бейнесін насихаттайтын контент жасауға мемлекеттік тапсырыстың басымдығын ауыстыру туралы ұсынысқа қатысты министр бұл тақырыптың 2026 жылға бекітілген тақырыптық бағыттар аясында қамтылғанын мәлімдеді. «Рухани құндылықтар және патриоттық тәрбие», «Әлеуметтік-демографиялық даму», «Білім және ғылым» сияқты бағыттар арқылы жауапкершілік, өзара құрмет, білім мәдениеті және сындарлы мінез-құлық модельдері насихатталады.
Сөйлеу мәдениеті мен ұлттық әдебиетті насихаттайтын блогерлер мен инфлюенсерлерге грант бөлу мәселесі бойынша Аида Балаева Мәдениет және ақпарат министрлігі «Масс-медиа туралы» заңға сәйкес отандық контентті дамытуға, ақпараттық егемендікті нығайтуға мемлекеттік емес БАҚ-қа гранттар ұсынатынын айтты. Бұл жұмыстар үкіметтің тұрақты бақылауында екенін атап өтті.
