Алматыда Сейфуллин даңғылы бойындағы заңсыз құрылыстарды сүру жұмыстары жалғасып жатыр. Бұл жолы рұқсат құжаттарынсыз салынған тағы бір ғимарат бұзылды, деп хабарлайды Qazaqtoday ақпарат агенттігі.
Мегаполистегі нысан иесіне бұған дейін бірнеше рет ескерту жасалып, жауапкершілікке тартылған. Алайда, ол заң талаптарын орындамаған соң, іске сот араласып, ғимаратты мәжбүрлеп бұзу туралы түпкілікті шешім шығарған.
14 сәуірде сот орындаушылары мен арнайы құрылыс техникасы нысанға келіп, сүру жұмыстарын бастады. Қала билігі ғимараттың қандай мақсатта салынғанын нақтыламады, бірақ бұл қаладағы заңсыз құрылыстармен күресу бойынша ауқымды науқанның бір бөлігі екенін атап өтті.
Бұған дейін осы даңғылдың бойында салынып бітпеген бес қабатты ғимарат пен дәмхананың жанынан соғылған заңсыз қосалқы құрылыс та сүрілген болатын. Қала билігі мегаполистің сәулеттік келбетін бақылауды күшейтіп, заңсыз нысандарды анықтау және бұзу шараларын жүйелі түрде жалғастыруда.
Фото: Әлеуметтік желіден
