Қазақстандық парашахматшылар Бишкектегі Азия чемпионатында 15 медаль алды
Қазақстандық парашахматшылар Бишкектегі Азия чемпионатында 8 алтын, 4 күміс, 3 қола медаль жеңіп алды. Командалық есепте Қазақстан үшінші орында.
Фото: пресс-служба Федерации шахмат
Бишкекте өткен 4-ші Азия шахмат чемпионатында Қазақстанның параспортшылары 8 алтын, 4 күміс және 3 қола медаль жеңіп алды. Құрама қоржынына бес спортшы үлес қосып, олардың әрқайсысы үш рет пьедесталға көтерілді.
Бұл туралы Qazaqtoday.info сайты хабарлайды.
Чемпионаттың басты кейіпкерлерінің бірі — жасөспірім Дінмұхаммед Оралбаев. Ол есту қабілеті бұзылған спортшылар санатындағы үш турнирдің бәрінде жеңіске жетіп, классикалық шахмат, рапид және блиц бойынша Азия чемпионы атанды.
Есту қабілеті бұзылған әйелдер арасында Алмаш Нүсерова үш медаль алды: классика мен рапидте алтын, блицте күміс.
Нина Жуковская есту қабілеті бұзылған әйелдер санатында блицте алтын, классика мен рапидте күміс медаль жеңіп алды.
Аман Наурызғалиев медальдардың толық жиынтығын иеленді: блицте чемпион болып, классикада күміс, рапидте қола жүлдегер атанды. Бұл нәтижелер есту қабілеті бұзылған ерлер арасында тіркелді.
Ринат Сатыбалдиев көру қабілеті бұзылған спортшылар арасында блицте чемпион атанып, классика мен рапидте қола медаль алды.
Классикалық шахмат бойынша командалық медаль есебінде Қазақстан үшінші орынды иеленді. Еліміздің қоржынында екі алтын, екі күміс және бір қола медаль бар. Бірінші орында Өзбекстан, екінші орында FIDE командасы. Қазақстандық спортшылар қосымша көрсеткіштер бойынша екінші орыннан қалып қойды.
Денсаулық мүмкіндіктері шектеулі спортшылар арасындағы 4-ші Азия шахмат чемпионаты (4th Asian Chess Championship for Players with Disabilities) 30 қазаннан 7 қарашаға дейін Бишкекте (Қырғызстан) өтті. Жарысқа алты елдің өкілдері қатысты. Ерлер мен жасөспірімдер, әйелдер мен қыздар үш санатта бөлек сынға түсті: есту қабілеті бұзылған, көру қабілеті бұзылған, сондай-ақ тірек-қимыл аппараты зақымдалған және басқа да физикалық бұзылыстары бар спортшылар.
Медальдар үш дисциплина бойынша сарапқа салынды: классика, рапид және блиц. Командалық есепке тек классикалық шахмат жарыстарының нәтижелері ғана есептелді.
