ШҚО әкімінің орынбасары ұсталды: әкімдік жауап берді
ШҚО әкімдігі Жақсылық Омардың ұсталғаны туралы ақпаратқа жауап берді. Әкімдік шенеуніктің денсаулығына байланысты демалыста екенін айтты.
Шығыс Қазақстан облысының әкімдігі әлеуметтік желіде тараған әкімнің бірінші орынбасары Жақсылық Омардың ұсталуы туралы ақпаратқа қатысты түсінік берді, деп хабарлайды Qazaqtoday ақпарат агенттігі.
Әкімдіктің баспасөз қызметі желіде тараған қауесеттің ресми дереккөзі жоқ екенін және бұл мәліметті растай алмайтынын жеткізді.
«Шығыс Қазақстан облысы әкімдігінде лауазымды тұлғаға қатысты ешқандай мәлімет жоқ. Интернет желісінде тарап жатқан ақпараттың ресми дереккөзі көрсетілмеген. Қолымыздағы дерек бойынша, шенеунік денсаулығына байланысты уақытша демалыс алған болатын», – деп хабарлады ШҚО әкімдігінің баспасөз қызметі.
Бұған дейін бірқатар ақпарат көздерінде ШҚО әкімінің бірінші орынбасары мен басқа да тұлғалардың ұсталғаны туралы ақпарат тараған болатын. Алайда, бұл мәліметті құқық қорғау органдары ресми түрде растаған жоқ.
Фото: Әлеуметтік желіден
