Бурабайда катамаранға мінген балалар жазым бола жаздады

Бес бала Қатаркөл көлінің жағалауында иесіз қалған катамаранды тауып алып, түнгі уақытта оған мінген, деп жазады Qazaq Today ақпарат порталы.

Оқиға Ақмола облысының Бурабай ауданында болды. Жағалаудан 500 метр жүзіп кеткенде үш бала қорқып, катамараннан өз бетінше жүзіп, жағаға жеткен.

Катамаранда 2008 және 2014 жылы туған екі бала қалып қояды. Олардың біреуі жүзе алмады. Қатты желдің салдарынан катамаран жағалаудан тым алыстап кетті. Жағаға оралған балалар 112 нөміріне қоңырау шалып, құтқарушылардан көмек сұраған.

«Суда құтқару жасағының қызметкерлері тепловизоры бар ұшқышсыз ұшу аппаратын пайдаланып, балаларды тапты. Қайықпен жеткен құтқарушылар оларды жағаға жеткізіп, жедел медициналық жәрдем көлігіне тапсырды.

Кәмелетке толмағандардың ата-аналары ҚР ӘҚБтК-нің 412-бабы бойынша әкімшілік жауапкершілікке тартылды», – делінген ТЖМ таратқан хабарламада.