Талдықорғанда ҰҚК генералы сотталды

Жетісу облысында Ұлттық қауіпсіздік комитетінің генералына сот үкім шығарды. Талдықорған қалалық соты оны алты жылға соттады. Лауазымды адамның өз құқықтары мен өкілеттіктерінен тыс және ауыр зардаптарға әкеп соққан билік пен лауазымдық өкілеттіктерді асыра пайдалануы фактісі бойынша айып (ҚК-нің 362-бабының 4-бөлігі) тағылған, деп хабарлайды Qazaq.today.

«Сотпен анықталғаны
К. Алматы облысы ҰҚКД бастығы бола тұра, өзінің лауазымдық өкілеттігінен асыра пайдалана отырып, 2022 жылғы 5 қаңтарда орын алған оқиғаларды ескере отырып, өзінің лауазымдық міндеттерін елемей, жеке құрамға Департамент ғимаратын қорғау жөнінде шаралар қолданбауға; әкімшілік ғимараттан кетуге; қызметтік және құпия құжаттаманы жоюға және тұрғылықты жерлеріне тарауға заңсыз бұйрық берген, нәтижесінде кейіннен ҰҚКД ғимаратын басып алуға әкеп соқтырды («құпия» деген белгіге байланысты басқа мән-жайларды жария ету мүмкін емес)», — делінген соттың баспасөз қызметі таратқан хабарламада.

Сот үкімімен ҰҚКД бұрынғы бастығы ҚР ҚК 362-баптың 4-бөлігі бойынша кінәлі деп танылды. Оған 10 жыл мерзімге құқық қорғау органдарында белгілі бір лауазымдарды атқару құқығынан айыра отырып, 6 жылға бас бостандығынан айыру жазасын тағайындады.
Қазақстан Республикасының Президентіне К.-ге қатысты Ұлттық қауіпсіздік генерал-майоры арнаулы атағынан және мемлекеттік наградалар мен ордендерден айыру туралы ұсыныс енгізілді.

Сот үкімі заңды күшіне енген жоқ.

Qazaq.today