Айсұлу Сүлейменова Азия параойындарында 100 метрге жүгіруден континенттік рекорд орнатты

Фото: instagram/ais_01kz

Жапонияда өткен V Азия параойындарында қазақстандық жеңіл атлет Айсұлу Сүлейменова 100 метрге жүгіруден жаңа континенттік рекорд орнатты. Ол қашықтықты 16,18 секундта еңсерді.

Бұл туралы Qazaqtoday.info сайты хабарлайды.

Айсұлу T62 класында өнер көрсетеді — бұл санат екі аяғынан айырылған, жүгіру протездерін қолданатын спортшыларға арналған. Турнирде оның санатында қарсылас болмағандықтан, қазақстандық спортшы T64 класындағы (бір аяғы зақымдалған) атлеттермен біріккен жүгіруде стартқа шықты. Жалпы есепте ол бесінші орынға келгенімен, көрсеткен уақыты Азия үшін рекордтық болды.

2011 жылы Айсұлу ауыр жол апатына түсіп, екі аяғынан айырылған. Қиын реабилитациядан өткен ол өзін спорттан тапты.

«Мен, шынымды айтсам, алғашында сенбедім, үнемі таблодағы уақытқа қарап отырдым. (…) Бірақ эмоция, әрине, асып тұрды, мен сонда жылап қала жаздадым», — деп бөлісті параспортшы.

Айсұлу спорттық мансабын белсенді қоғамдық қызметпен ұтымды ұштастырады — тамызда ол ҚР Құрылтайының депутаты болды, сондай-ақ цифрландыру саласында өзін дамытып келеді.

Рекордшының жоспарында — күшейтілген жаттығулар және 2028 жылы Лос-Анджелесте өтетін Паралимпиада ойындарына дайындық.

Жапониядағы V Азия параойындары бүкіл Қазақстан құрамасы үшін жеңісті болды. Ұлттық команда 50 медаль жеңіп алды (12 алтын, 16 күміс және 22 қола), елдің тарихи рекордын жаңартып, жалпыкомандалық есепте тоғызыншы орынға тұрақтады. Айсұлу Сүлейменовадан бөлек, турнирде Еркін Ғаббасов, Давид Дегтярев және Диас Кенжебек те Азия параойындары мен континент рекордтарын орнатты.