Тоқаев Айсұлу Сүлейменованың Азия рекордын ерекше атап өтті

Фото: Aqorda

Мемлекет басшысы Қасым-Жомарт Тоқаев Жапонияда өткен Азия Пара ойындарында қазақстандық параспортшы әрі Құрылтай мүшесі Айсұлу Сүлейменованың қол жеткізген жетістігін айрықша атап өтті. Бұл туралы Ақордаға сілтеме жасай отырып, El.kz хабарлайды.

Бұл туралы Qazaqtoday.info сайты хабарлайды.

Президент бұл жайында 9 қарашада Азия ойындары мен Азия Пара ойындарының жеңімпаздары мен жүлдегерлерін құрметтеу рәсімінде айтты. Ол Сүлейменованың спринт түрінде континенттік рекорд орнатқанын ерекше атап өтті.

Жапониядағы жарыста спортшы 100 метрлік қашықтықты 16,18 секундта жүгіріп өтті. Бұл нәтиже T62 классификациясында жаңа Азия рекордын орнатты. Аталған санатқа жүгіруге арналған протездерді пайдаланып, екі аяғы да зақымданған спортшылар кіреді.

Оның классификациясында басқа қарсылас болмағандықтан, ол T64 санатындағы спортшылармен бірге жарысқа қосылды. Біріккен финалда қазақстандық спортшы 5-орынды иеленді, алайда өз классификациясындағы рекордтық нәтижесін сақтап қалды.

«Осы тұрғыда Азия Пара ойындарында 100 метрлік қашықтықта Азия рекордын орнатқан Айсұлу Сүлейменованың жетістігі ерекше назар аударуға лайық», — деді Қасым-Жомарт Тоқаев.

Мемлекет басшысы спортшының табандылығын, сондай-ақ оның Құрылтайдағы қызметін жоғары бағалады. Ол Сүлейменованың қоғамдық қызметпен айналысуды жалғастырып, көпшілікке үлгі болатынын атап өтті.

Рәсім барысында Тоқаев Қазақстан ұлттық құрамасының Азия ойындарындағы нәтижелері мен спортты дамытуды қолдау бойынша қабылданып жатқан шараларға да тоқталды. Оның айтуынша, соңғы 5 жылда саланы дамытуға 616 миллиард теңгеден астам қаражат бөлінген.