Зеленский АҚШ өкілдерімен 90 минут сөйлесті: Абу-Дабидегі келіссөздерге дайындық

Сурет: madeniportal.kz

Украина Президенті Владимир Зеленский АҚШ-тың арнайы өкілдері Стив Уиткофф пен Джаред Кушнермен телефон арқылы бір жарым сағат сөйлесті. Әңгіме барысында тараптар Ресей мен Украина арасындағы соғысты тоқтатуға бағытталған кезекті келіссөздерге дайындықты талқылады. Үш елдің делегациялары 10–11 қарашада Абу-Дабиде кездеседі деп жоспарланып отыр.

Бұл туралы Qazaqtoday.info сайты хабарлайды.

4 қарашада өткен әңгімеде Украинаға берілетін қауіпсіздік кепілдіктері, соғыстан кейінгі қалпына келтіру жұмыстары және елдің әуе қорғанысын күшейту мәселелері көтерілген.

Зеленскийдің айтуынша, Киев бейбіт келіссөздерге қатысты өз ұсыныстарын америкалық тарапқа жолдаған. Украина басшысы соғысты тоқтату үшін уақыт жоғалтпау керектігін атап өтті.

«Украина қажетті қадамдарға дайын. Біздің ұсыныстарымыз нақты әрі америкалық тарапқа жеткізілді. Бұл соғысты мүмкіндігінше тез аяқтау үшін келіссөздер барынша қарқынды жүруі керек», – деді Зеленский.

Президент Ресейдің әуе шабуылдарына қарсы тұру үшін Patriot зениттік-зымыран кешендеріне арналған зымырандар қажет екенін де айтты. Сонымен қатар АҚШ-пен дрон өндірісі және жеткізілімі саласындағы ынтымақтастықты жалғастыру мәселесі талқыланған.

«Бейбітшіліктің баламасы жоқ. Соғыстан кейінгі қауіпсіздік кепілдіктері шын мәнінде мызғымас болуы тиіс», – деп мәлімдеді Украина Президенті.

Бұған дейін Брюссельде Украина, АҚШ, Еуропалық одақ, НАТО, Дүниежүзілік банк және бірқатар еуропалық мемлекеттердің өкілдері Украинаны соғыстан кейін қалпына келтіру мәселесін талқылаған. Ал 5 қарашаға қауіпсіздік кепілдіктеріне арналған келесі кездесу жоспарланған.

Reuters агенттігінің хабарлауынша, 10–11 қарашада Біріккен Араб Әмірліктерінің астанасы Абу-Дабиде Украина, Ресей және АҚШ делегацияларының үшжақты келіссөздері өтпек. АҚШ тарапынан Стив Уиткофф пен Джаред Кушнер қатысады деп күтілуде.

Кездесуде соғысты тоқтату жолдары, шиеленісті бәсеңдету, гуманитарлық мәселелер және соғыстан кейінгі қауіпсіздік тетіктері қаралады.

Алайда тараптардың ұстанымдарында әлі де елеулі айырмашылықтар бар. Сондықтан алдағы келіссөздердің нақты бейбіт келісімге ұласатыны әзірге белгісіз.