Көкшетауда бала қаққан жүргізуші жазасыз қала ма
Фото: видеодан скрин
Желіде Көкшетау қаласында әйел адамның кішкентай баланы көлікпен қағып кеткен сәті түсірілген видео тарап, жұрттың ашуын тудырды, деп хабарлайды Qazaqtoday.info.
Оқиға 19 мамыр күні болған, бүлдіршін сол сәтте анасымен бірге тротуарда тұрған жерінен соққыға жығылған.
Ақпарат бойынша, зардап шеккен қыз бала жеңіл жарақат алып, дәрігерлердің тексеруінен кейін үйіне жіберілді. Алайда халықты таңғалдырғаны бұл емес — зардап шеккен қыздың ата-анасы жүргізуші әйелге ешқандай талап қоюдан бас тартқан. Бірақ «жабулы қазан жабулы күйінде» қалмайды. Ақмола облыстық Полиция департаменті оқиғаға қатысты ресми түсініктеме беріп, әкімшілік іс қозғалғанын хабарлады. Жүргізуші әйел қолданыстағы заңнамаға сәйкес жауапкершілікке тартылады. Қазір әлеуметтік желі қолданушылары «әйелдер және рөл» тақырыбын қызу талқылап, пікірталас тудыруда. Бұл жағдай қоғамдағы жаяу жүргіншілер қауіпсіздігі мен жүргізушілердің жауапсыздығы мәселесін қайтадан бірінші орынға шығарды.
