Белгілі кәсіпкер Арсен Томский мәнерлеп сырғанаушы Михаил Шайдоровтың әкесіне жаңа автокөлік сыйлады, деп хабарлайды Qazaqtoday ақпарат агенттігі.
Кәсіпкер бұл қадамы арқылы спортшының Италиядағы Олимпиада ойындарындағы «сенсациялық» жеңісін ерекше атап өткісі келгенін жеткізді. Оның айтуынша, бұл сыйлық – ұлының арманы үшін кезінде жеке көлігін құрбан еткен әкесіне әрі алғашқы бапкеріне деген алғыс.
«Бұл – спортшының керемет жеңісіне ортақтасу ғана емес, сонымен қатар ұлының болашағы үшін бәрін жасаған әкеге деген құрмет. Кезінде ол баласының спортпен айналысуы үшін өз көлігін сатуға мәжбүр болған», — деп атап өтті Томский.
Еске сала кетейік, бұған дейін әнші Димаш Құдайберген де Олимпиада чемпионы атанған Михаил Шайдоровтың өзіне автокөлік сыйлайтынын мәлімдеген болатын.
Фото: Әлеуметтік желіден
