Ұлытау облысы Мәдениет басқармасының басшысы сотталды

Ұлытау облысы Мәдениет, тілдерді дамыту және архив ісі басқармасының басшысы сотталды, деп хабарлайды Qazaq Today ақпарат агенттігі.

Жезқазған қалалық соты Ә.С. Омарға қатысты үкім шығарды, деп жазады Azattyq Rýhy.

Ол мұражай мамандары мен басқа да ғалымдардың мақалалар жинағын шығару бойынша орындалмаған жұмыстары үшін заңсыз аудару арқылы 2,3 млн теңге сомасында бюджет қаражатын жымқырғаны үшін кінәлі деп танылды.

«Ә. Омар бұрын Жезқазған қалалық сотының 2024 жылғы 12 наурыздағы үкімімен пара алғаны үшін 6 жылға бас бостандығынан айырылғандықтан, Қазақстан Республикасының Қылмыстық кодексінің 58-бабының 3,6 бөліктеріне сәйкес, қылмыстық құқық бұзушылықтардың жиынтығы бойынша тағайындалған жазаның өтелмеген бөлігін ішінара қосу арқылы Ә.С. Омарға мемлекеттік қызметте қызмет атқару құқығынан өмір бойына айыра отырып, 6 жыл 6 ай мерзімге бас бостандығынан айыру түпкілікті жазасы тағайындалды», — делінген хабарламада.

Үкім заңды күшіне енді.

Фото: Pixabay.com