Костанайда масқара жағдай: зиратты сиырлар басып жүр, ал әкімдік мәселені жылдар бойы шеше алмай келеді

Фото: видеодан скрин

Костанай қаласының тұрғындары зираттағы сұмдық жағдайға қайта шағымданды: әуежай маңындағы қабірстанда сиырлар еркін жүріп, қорымды таптап, жерді лайға айналдырған.

Әлеуметтік желіде тараған видеоларда малдың қорымның ортасында жайбарақат жайылып жүргені анық көрінеді.
Жергілікті тұрғындар бұл жағдайды марқұмдардың аруағына жасалған ашық құрметсіздік деп бағалап, биліктің әрекетсіздігіне ашулануда.

«Жылдар бойы осы мәселе көтеріліп келеді, бірақ ешкім шындап айналыспайды», – дейді қала тұрғындары.

Азаматтар әкімдіктен қорымды қоршау орнатуды, мал иелерін жауапқа тартуды және тәртіпті біржола реттеуді талап етеді.

«Адам өз жақынының қабіріне келеді, ал айналаның бәрі сиырдың ізі мен қиы. Бұдан өткен масқара бар ма?» – деп ашынады жұрт.

Көпшілік полицейлік патруль қоюды немесе жүйелі бақылау енгізуді сұрап отыр.

Тұрғындар мал иелерінің жауапсыздығын да сынға алып, айыппұлсыз бұл мәселе шешілмейтінін айтады.

«Қорым – жайылым емес, бұл қасиетті жер екенін түсіндіретін уақыт келді», – дейді қала белсенділері.

Әзірге жауапты органдар үнсіз, ал жұрт бұл мәселенің қанша уақытқа дейін созылатынын түсінбей отыр.