Миллиардтар ауаға ұшты: Ақсу қант зауытына бөлінген қаржы қайда кетті және кім жауап береді?

Фото: Pixabay

Қазақстанда әлеуметтік-кәсіпкерлік корпорациялар арқылы Ақсу қант зауытын қайта жандандыруға қомақты қаражат бөлінген болатын. Бұл бастама елдің азық-түлік қауіпсіздігін нығайтуға бағытталған еді.

Алайда бөлінген қаржының қайда жұмсалғаны белгісіз болып қалды. Зауыттың жұмысы жиі тоқтап, шенеуніктер нақты мәлімет беруден бас тартып отыр.

Ақсу қант зауытының жобасы «Жетісу» әлеуметтік-кәсіпкерлік корпорациясы арқылы жүзеге асырылған. Мемлекет зауытты қалпына келтіру үшін миллиардтаған теңге бөлді.

Ресми деректерде нақты сома көрсетілмегенімен, ашық ақпарат көздері шамамен 15 миллиард теңге бөлінгенін айтады. Расталған сома — 3,3 миллиард теңге, ол 2023 жылы жөндеу жұмыстарына бағытталған. Қалған қаржының тағдыры әзірге белгісіз. Яғни, қанша қаражат жұмсалып, қандай нәтиже алынғаны туралы нақты ақпарат жоқ.

Бұл инвестициялар үмітті ақтады ма? — Жоқ, ақтаған жоқ.

2024 жылғы қант қызылшасын қабылдау науқанын еске алсақ та жеткілікті. Сол кезде зауыттың жұмысы жиі іркіліп, қабылдау пункттерінде ұзын-сонар кезектер пайда болды. Көлік жүргізушілері тәулік бойы күтіп, өнімді өткізу мен өңдеу үдерісі үнемі кешігіп отырды.