Түркістан облысында бұрынғы мектеп директоры сотталды

Фото: Polisia.kz

Қоғамда резонанс тудырған қылмыстық іс бойынша үкім шықты, деп хабарлайды Qazaq Today ақпарат порталы. 

Түркістан облыстық кәмелетке толмағандар істері жөніндегі мамандандырылған соты бұрынғы мектеп директоры Талғат Катауовты Қазақстан Республикасы Қылмыстық кодексінің 122-бабы бойынша кінәлі деп таныды. Аталған бап — «Он алты жасқа толмаған адаммен жыныстық қатынас жасау немесе нәпсіқұмарлық сипаттағы өзге де әрекеттер» бойынша қылмыстық жауапкершілікті көздейді.

Сот үкіміне сәйкес, Катауов 2 жыл бес ай мерзімге бас бостандығынан айырылды.

— Алғашында іс Қылмыстық кодекстің 124-бабымен тергелген. Алайда сот процесі өтіп жатқан кезде прокурор 122-бабының 1-бөлігі, яғни он алты жасқа толмаған адамға сексуалдық сипаттағы өзге де әрекеттерді жасау қылмысы бойынша айып тақты және осы бапқа сай сотталды. Сотталушының әрекеттерінде жеңілдететін де, ауырлататын да мән-жайлар анықталмады. Үкім заңды күшіне енген жоқ, — деді облыстық соттың баспасөз қызметінің жетекшісі Заманбек Исмаилов.

Талғат Катауов — Батыс Қазақстан облысындағы бір мектептің бұрынғы директоры болғаны белгілі.