Қостанай облысында екі шетелдік заңбұзушы елден шығарылады
Қостанай облысында көші-қон заңнамасын бұзған екі шетелдік азамат Қазақстаннан шығарылады. Сот шешімі шықты, тағы екі азаматқа 75 687 теңгеден айыппұл салынды.
Фото: Қостанай обл. ПД
Қостанай облысында көші-қон заңнамасын бұзған екі шетелдік азамат Қазақстаннан шығарылады. Бұл туралы шешімді полиция жинаған материалдарды қараған сот қабылдады.
Бұл туралы Qazaqtoday.info сайты хабарлайды.
Заңбұзушылықтар Қостанай ауданында «Қауіпсіз үй» және «Нелегал» жедел-профилактикалық іс-шаралары кезінде анықталған.
Өңірлік полиция департаментінің мәліметінше, шетелдік азаматтар Қазақстанда тіркелудің белгіленген тәртібін бұзған. Сондай-ақ тиісті рұқсатсыз жұмыс істеген.
Материалдарды қарау қорытындысы бойынша сот екі шетелдікті ел аумағынан шығару туралы шешім қабылдады.
Тағы екі азамат әкімшілік жауапкершілікке тартылды. Олардың әрқайсысына 75 687 теңге көлемінде айыппұл салынды. Өндірілген айыппұлдардың жалпы сомасы 151 374 теңгені құрады.
