Алматы-Стамбул рейсінде жолаушының рюкзакінен ақша мен банк картасы жоғалды
Алматы-Стамбул рейсінде қазақстандық жолаушының рюкзакінен банк картасы мен 450 доллар жоғалды. Air Astana тергеу өз құзыретінде емес екенін мәлімдеді.
Фото: pexels.com
Алматыдан Стамбулға ұшу кезінде Air Astana әуе компаниясының ұшағы бортында жолаушы әйелдің қол жүгіндегі рюкзакінен банк картасы мен 450 доллар қолма-қол ақшасы жоғалған. Бұл туралы зардап шеккен қазақстандық әйел Threads әлеуметтік желісіндегі жазбасында хабарлады.
Бұл туралы Qazaqtoday.info сайты хабарлайды.
Оның айтуынша, ақша мен төлем картасы әмиянда болған, оны әйел рюкзакінің тереңіне жасырған. Жолаушы ұшаққа мінер алдында барлық соманың сақталғанын растайды. Ол ұрлық ұшу кезінде, жолаушылар фильм көріп, салондағы жағдайға мән бермеген сәтте болуы мүмкін деп болжайды.
Заттардың жоғалғанын байқаған әйел қатты шошыған. Ол дереу 102 нөміріне хабарласып, полицияға жүгінген және Air Astana қолдау қызметіне хабарласып, қылмыскерді қайдан және қалай іздеу керектігін білмейтінін айтқан.
Әуе компаниясы жолаушыдан кешірім сұрап, болған жағдайға өкініш білдірген, алайда авиакәсіпорынның мұндай тергеу жүргізуге өкілеттігі жоқ екенін түсіндірген.
Тасымалдаушы өкілдері жолаушылар багажының ішіндегі заттарды ұрлағандарды іздестіру, кінәлілерді жауапкершілікке тарту және материалдық шығынды өтеу мәселелері тек құқық қорғау органдарының құзыретінде екенін, зардап шеккен адамның ресми арызбен соларға жүгінуі қажеттігін атап өткен.
«Егер қылмыс Қазақстан Республикасынан тыс жерде жасалса немесе қылмыс жасалған жерді анықтау мүмкін болмаса, не қылмыстар әртүрлі жерлерде жасалса, іс тергеу аяқталған жердегі сотта қаралады», – деп хабарлаған тасымалдаушы.
Енді халықаралық рейсте болған оқиғаның толық бейнесін қалпына келтіру және ықтимал ұрының жеке басын анықтау құқық қорғау органдарының қызметкерлеріне жүктеледі.
