Шерзат Болат ісі қаралып жатқан сәтте жер сілкінді

Талдықорған қаласында Шерзат Болаттың өліміне қатысты өтіп жатқан сот процесі кезінде жер сілкінісі тіркелді, деп хабарлайды Qazaq Today ақпарат порталы.

Сот тыңдауы барысында жәбірленуші тараптың қорғаушылары тәуелсіз сарапшы Тахир Халимназаровқа сауалдар қойып жатқан болатын. Сол сәтте зал іргесі шайқалып, залда отырғандар абдырап қалды. Іске жетекшілік етіп отырған судья залдағыларды сабырға шақырып, «тынышталыңыздар, жер сілкінісі тоқтаған соң ғана сыртқа шығамыз» деп ескертті.

Осы арада жәбірленуші тараптың адвокаты сәл әзілге сүйеніп, «Қазақтар ғой, ‘бісміллә’ деп отыра береді, жалғастыра берейік» деп ұсыныс білдірді. Бұл сөзге залдағылар жымиып, күлкілерін жасыра алмады.

Дегенмен, қауіпсіздік талаптарын ескере отырып, судья сот отырысына үзіліс жариялап, қатысушыларды сыртқа шығуға шақырды.