Жезқазғанда екі жігіт қаржы пирамидасын құрып, 68 млн теңгені қалтасына басқан

Фото: canva.kz

Қаржылық мониторингі агенттігі Ұлытау облысы тұрғындарына қатысты істі тергеп бітті. Олар қаржы пирамидасын құрып, жарнамалады деп айыпталып отыр, деп хабарлайды Qazaq Today ақпарат порталы. 

Екі азамат 9 айдан астам уақыт бойы MetaGo қаржы (инвестициялық) пирамидасын жарнамалаумен айналысқан, сондай-ақ оның Жезқазған қаласындағы аумақтық құрылымдық бөлімшесін басқарған.

Аталған азаматтар жоғары табыс уәде ете отырып, облыс тұрғындарының инвестицияларын тартқан.

Сотқа дейінгі тергеп-тексеру барысында аталған тұлғалардың заңсыз қызметінен түскен табыс сомасы 68 млн теңгеден асты, сондай-ақ 37 млн теңгеден астам сомаға мүлікке тыйым салынды.

ҚР ҚПК-нің 201-бабына сәйкес тергеу мүддесінде өзге де ақпарат жарияланбайды.

Агенттік азаматтарды пассивті кіріс пен артық пайданы уәде ететін күмәнді инвестициялық жобаларға сенбеуге шақырады.