ҰҚК Шекара қызметі елден 8 млн долларды заңсыз әкетпек болғандарды ұстады

«Алматы» шекаралық бақылау басқармасы елімізден 8 миллион долларды заңсыз әкетпек болғандардың жолын кесті, деп хабарлайды Qazaq.today ақпараттық порталы. Бұл туралы ҚР Ұлттық қауіпсіздік комитетінің баспасөз қызметі мәлім етті.

«Қазақстан Республикасы Президентінің «Қазақстан Республикасының қаржылық тұрақтылығын қамтамасыз ету жөніндегі шаралары туралы» 14 наурыздағы № 830 Жарлығын іске асыру шеңберінде «Алматы» шекаралық бақылау басқармасы Алматы қаласының Авиациялық көлік прокуратурасының үйлестіруімен осы  жылдың басынан бастап Қазақстан Республикасынан 8 000 000 АҚШ долларынан астам сомаға валютаны әкетуге жол берген жоқ», — делінген ҰҚК хабарламасында.

Осыған байланысты шекара қызметі азаматтарға «Қазақстан Республикасының қаржылық тұрақтылығын қамтамасыз ету жөніндегі шаралары туралы» Қазақстан Республикасы Президентінің 2022 жылғы 14 наурыздағы № 830 Жарлығының 1-тармағының 1) тармақшасына сәйкес 10 000 АҚШ доллары баламасынан асатын сомада шетел валютасын әкетуге тыйым салынғанын хабарлайды.