Жамбыл облысында сотталушыға тыйым салынған заттар беру әрекетінің жолы кесілді
Жамбыл облысындағы №67 мекемеде сотталушыға тыйым салынған заттарды беру әрекетінің жолы кесілді. Сусабын бөтелкесінен ақ ұнтақ және үш SIM картасы табылып, тергеу басталды.
Фото: Жамбыл облыстық полиция департаменті
Жамбыл облысы бойынша қылмыстық-атқару жүйесі департаментінің аралас қауіпсіздік жөніндегі №67 мекемесінде тыйым салынған заттарды сотталушыға өткізу әрекетінің жолы кесілді.
Бұл туралы Qazaqtoday.info сайты хабарлайды.
Мекеменің жедел-режимдік бөлімінің қызметкерлері қабылдау пунктінің бақылаушыларымен бірлесіп, азамат әкелген азық-түлікті тексеру барысында қылмыстық-атқару жүйесі мекемелерінде сақтауға және пайдалануға тыйым салынған заттарды анықтады.
«Сусабын бөтелкесінің ішінен белгілі бір иісі бар ақ ұнтақ зат табылды, болжамды салмағы шамамен 1-2 гр. Сонымен қатар, үш SIM картасы тәркіленді. „Сыйлық“ мекемеде сотталғанға берілгені анықталды», — делінген хабарламада.
Аталған факт бойынша сотқа дейінгі тергеу басталды. Алынған заттар оралып, мөрленген, сот-химиялық сараптама тағайындалған. Қазіргі уақытта болған оқиғаның барлық мән-жайын анықтауға бағытталған тергеу шаралары жүргізілуде.
