Таудағы тосын кездесу: Алматыда туристер қар барысын кезіктірді
Фото: видеодан скрин
Алматы тауларында серуендеп жүрген туристер қар барысын кездестірді. Сирек кездесетін жыртқыш адамдар жүрген соқпаққа шығып, саяхатшылар оны видеоға түсіріп алған, деп хабарлайды Qazaqtoday.info ақпарат порталы.
Куәгерлердің айтуынша, тауға көтеріліп бара жатқанда олардың соңынан ит ерген. Жануар бұған дейін тиіндерді көрген кезде үргендіктен, туристер бастапқыда оның әрекетіне аса мән бермеген.
Біраз уақыттан кейін соқпаққа кенеттен қар барысы шыққан. Туристер жыртқышқа жақындамай, иттің онымен байланысқа түсуіне жол бермеуге тырысқан. Алайда ит адамдарды тыңдамай, қар барысына қарай үрген.
Кейін соқпақтың екінші жағынан тағы бірнеше адам келген. Қар барысы адамдарға шабуыл жасамай, тау беткейімен жоғары қарай кетіп қалған. Ит жыртқыштың соңынан біраз уақыт еріп, кейін туристер оны алып кеткен.
