Солтүстік Қазақстанда 89 жастағы әйелді өлтірді деген күдікпен ұлы ұсталды
Солтүстік Қазақстан облысының Жамбыл ауданында 89 жастағы әйелдің өліміне қатысты қылмыстық іс қозғалды. Күдікті – оның 66 жастағы ұлы, ол ұсталды.
Фото: freepik
Солтүстік Қазақстан облысының Жамбыл ауданында 89 жастағы әйелдің өліміне қатысты қылмыстық іс қозғалды. Қайғылы оқиға Благовещенка ауылында болған.
Бұл туралы Qazaqtoday.info сайты хабарлайды.
Алдын ала мәлімет бойынша, анасы мен 66 жастағы ұлының арасында жанжал туындаған. Ашуға берілген ер адам қарт анасының басынан балтамен ұрған. Әйел алған жарақатынан оқиға орнында көз жұмған.
Марқұмның денесі үйдің ауласынан табылған. Күдікті болған жағдай туралы полицияға өзі хабарлаған. Қазір ол ұсталып, тергеу жүргізіліп жатыр.
«Благовещенка ауылындағы жеке үйдің ауласынан 89 жастағы әйелдің денесі табылды. Қылмысты жасады деген күдікпен оның 66 жастағы ұлы ұсталды. Аталған факті бойынша сотқа дейінгі тергеп-тексеру басталды. Қажетті сараптамалар тағайындалып, оқиғаның барлық мән-жайы мен себептері анықталуда», – деді СҚО полиция департаментінің аға инспекторы Юрий Клыков.
