Ақшамыз тағы «цифрланады»: қазақстандықтарға стейблкоин не үшін керек?

Қазақстанда теңгемен қамтамасыз етілетін стейблкоинді төлем құралы ретінде пайдалану тетігі енгізіліп жатыр.

Ұлттық банк өкілі Ерлан Ашыкбековтің айтуынша, азамат теңгесін жүйеге енгізіп, оның орнына цифрлық актив алып, сол арқылы төлем жасай алады.

Елде цифрлық қаржы активтерін реттейтін арнайы орта биыл 1 мамырдан бастап жұмыс істейді. Ал осы саладағы операторлар Ұлттық банктің лицензиясы негізінде қызмет көрсетеді. Стейблкоинді шығару мен айналымға енгізу тәртібі де заңмен реттелген.

Алайда қарапайым қазақстандық үшін негізгі сұрақ басқа: қолма-қол ақша, банк картасы мен мобильді төлем бар кезде тағы бір цифрлық төлем құралы не үшін қажет? Оның халыққа нақты қандай пайдасы тиетіні және күнделікті төлемде қаншалықты сұранысқа ие болатыны әзірге тәжірибе барысында көрінеді.