«Артымызды ашып тастады!»: Спорт журналисі Бішкектегі 51 мыңдық стадион туралы жазды
Бішкектегі 51 мың орындық стадион мен Астанадағы 3 600 орындық стадион салыстырылды. Журналист Аслан Қажен құрылысқа жұмсалған қаражаттың тиімсіздігін сынға алды.
Орталық Азиядағы ең үлкен стадион Бішкекте ашылды. Спорт журналисі Аслан Қажен бұл нысанды арнайы аралап қайтты. Оның пікірінше, стадионның сәулеті де, сапасы да жоғары деңгейде. Құрылысқа 60 млн доллар жұмсалған, ал сыйымдылығы 51 мың адамды құрайды. Нысан үш жылда бой көтерген.
Бұл туралы Qazaqtoday.info сайты хабарлайды.
Осы уақыт аралығында Астанада Қажымұқан Мұңайтпасов атындағы стадионның құрылысы жүрді. Ол да жақында пайдалануға берілді. Алайда бұл нысанның бюджеті 37 млн доллар болса, сыйымдылығы небәрі 3 600 орынға есептелген.
Спорт журналисі бұл екі нысанды салыстырып, елеулі айырмашылықты атап өтті. Қырғыздар 60 млн долларға 51 мыңдық стадион тұрғызса, қазақтар 37 млн долларға әлдеқайда аз орындық стадион салған. Аслан Қаженнің айтуынша, бұл — ешқандай логикаға сыймайтын шешім. Ол ақша мен алаңның қайда кеткеніне жауап беруді талап етеді. Журналист бұл жағдайды «масқара» деп бағалады.
