Еркебұлан Тоқтар өзбек боксшысын техникалық нокаутпен жеңді
Қазақстандық боксшы Еркебұлан Тоқтар Астанада өткен турнирде өзбекстандық Бобиржон Исроиловты екінші раундта техникалық нокаутпен жеңді.
Сурет: turkystan.kz
Астанада IBA Nomad лигасы аясында өткен International Boxing Day турнирінде қазақстандық файтер Еркебұлан Тоқтар (11-3) өзбекстандық Бобиржон Исроиловпен (1-0) жекпе-жек өткізді, деп хабарлайды Qazaqtoday.info сайты.
Кездесу кәсіпқой бокс ережесімен екінші орта салмақ дәрежесінде өтті. Қарсылас «Принц» лақап атымен танымал.
Бұған дейін Еркебұлан Тоқтардың кәсіпқой бокстағы көрсеткіші 2-0 (2 нокаут) болса, Бобиржон Исроиловтың рекорды 1-0 (1 нокаут) еді.
Жекпе-жек барысында қазақстандық спортшы басымдық танытып, қарсыласын бірнеше мәрте нокдаунға жіберді. Жалпы Бобиржон Исроилов төрт рет нокдаунда болды.
Екінші раундта төреші жекпе-жекті тоқтатып, Еркебұлан Тоқтардың техникалық нокаутпен жеңіске жеткенін ресми түрде тіркеді.
