Сатпаев ойнаған «Бернли» Англия лига кубогынан сенсациялық түрде шығып қалды
18 жастағы қазақстандық футболшы Сатпаев ойнаған «Бернли» Англия лига кубогының екінші раундында «Брэдфорд Ситиден» пенальтиде ұтылып, жарыстан шығып қалды.
Фото: Instagram/ @burnleyofficial
18 жастағы қазақстандық шабуылшы Англия лига кубогының екінші раундында «Брэдфорд Ситиге» қарсы қонақтық ойынды алғашқы минуттардан бастады. Кездесу Брэдфордтағы «Вэлли Пэрейд» стадионында өтті. Сатпаев алаңда 80 минут өткізді. Кейін бас бапкер Ники Хайен қазақстандықты даниялық футболшы Якоб Бруун Ларсенге ауыстырды.
Sports.kz-тің хабарлауынша, негізгі уақыт «Вэлли Пэрейд» стадионында голсыз аяқталды — 0:0. Финалдық ысқырықтан кейін бірден пенальти сериясы басталып, онда «Брэдфорд Сити» 4:2 есебімен жеңіске жетті.
Бұған дейін қазақстандық ағылшын клубы сапында Чемпионшиптің екінші турында «Вест Бромвичке» қарсы ойында дебют жасаған еді. Ол 57-минутта ауысымға шығып, алаңда 33 минут өткізді. Сонда «Бернли» 1:3 есебімен ұтылған болатын.
