Сорлаған жүргізушілер мен тозған көліктер: Қарағанды-Жезқазған тас жолы қашан жөнделеді?
Фото: Видеодан скрин
Желіде Қарағанды мен Жезқазған арасындағы республикалық маңызы бар тас жолдың сұмдық жағдайы түсірілген видео тарады, деп хабарлайды Qazaqtoday.info ақпарат порталы.
Бұл бағытта қатынау жүргізушілер мен жолаушылар үшін нағыз тозаққа айналған, себебі тегіс асфальттың орнында тек шұңқырлар мен оларды айналып өтудің азабы ғана қалған. Көлік иелері бұл жолда темір тұлпарларының қосалқы бөлшектерін қалдырып, ал өздері жүйкелері мен денсаулықтарын құртып жүргендерін айтып шағымдануда.
Стратегиялық маңызы бар күре жолға жауапты «ҚазАвтоЖол» ұлттық компаниясының немқұрайлылығы мен созбалаңға салуы бұл жағдайдың басты себебі болып отыр. Орасан зор бюджет бөлінсе де, компанияның әрекетсіздігі мен әлсіз бақылауы салдарынан халық жылдар бойы өмірлерін қауіпке тігіп жүруге мәжбүр.
Жол азабын тартқан жұртшылық енді құрғақ уәдеге емес, «ҚазАвтоЖол» тарапынан нақты нәтиже мен сапалы жұмыс талап етеді.
