Лоббизмге қарсылық: Әбілқасымованың отставкасын талап еткен жаңа петиция жарияланды
Фото: inbusiness.kz
Жандос Маратұлы GosRating.com платформасында банктердің мүддесін қолдауға қарсы, бірыңғай QR-код арқылы төлем жасау кезіндегі комиссияларды төмендету, азаматтарды қаржы алаяқтығынан қорғау және Қазақстан Республикасы Қаржы нарығын реттеу және дамыту агенттігінің (АРРФР) басшылығын қызметтен босату туралы петиция жариялады, деп хабарлайды Qazaqtoday.info.
Петиция авторының айтуынша, бастама ресми петициялар платформасына ұсынылғанымен, жарияланбаған. Осыған байланысты құжат GosRating.com сайтында орналастырылған.
Петиция мәтінінде АРРФР-дың қазіргі саясаты қарапайым азаматтар мен шағын және орта бизнес мүддесінен гөрі коммерциялық банктердің тұрақтылығы мен табыстылығына басымдық беретіні айтылған. Сондай-ақ қаржы алаяқтығының көбеюі, халықтың шамадан тыс несиеге тәуелділігі және микроқаржы ұйымдарының жоғары пайыздық мөлшерлемелері сынға алынған.
Бұдан бөлек, құжат авторы бірыңғай банкаралық QR-код жүйесі кәсіпкерлердің шығынын азайтуы тиіс болғанымен, іс жүзінде комиссиялық төлемдердің артуына алып келгенін мәлімдейді. Оның пікірінше, қазіргі тарифтер әсіресе шағын маржамен жұмыс істейтін кәсіпкерлердің табысына кері әсер етіп отыр.
Петицияда бірнеше талап қойылған. Атап айтқанда, бірыңғай QR-код арқылы төлем қабылдау кезінде комиссия мөлшерін 0,5%-дан асырмау, микроқаржы ұйымдарына қойылатын талаптарды күшейту және микронесиелер бойынша пайыздық мөлшерлемелерді төмендету, сондай-ақ Қаржы нарығын реттеу және дамыту агенттігінің төрағасы Мадина Әбілқасымованы қызметінен босату ұсынылған.
Қазіргі уақытта аталған петицияға қол жинау жалғасып жатыр. Оған қолдау білдіру немесе қарсы дауыс беру мүмкіндігі GosRating.com сайтында қолжетімді.
Ескерту: Петицияда келтірілген талаптар мен бағалар оның авторының ұстанымы болып табылады. Қазіргі уақытта АРРФР бұл бастамаға қатысты ресми пікір жариялаған жоқ.
Пікірлер бөліміндегі мына gosrating.com сілтемесі арқылы петицияны қолдап немесе оған қарсы дауыс беруге болады.
Петиция алаяқтық қаупін азайтуға бағытталған.
