Тегін емге ақша алған: Атырау облысында күдікті дәрігердің ісі сотқа жетті

Фото: ЖИ

ҚМА Атырау облысы бойынша департаменті алаяқтық және заңсыз материалдық сыйақы алу деректері бойынша күдікке ілінген хирург-дәрігерге қатысты тергеп-тексеруді аяқтады, деп хабарлайды Qazaqtoday.info.

Тергеу мәліметінше, маман мемлекет тарапынан төленіп қойған операциялар үшін емделушілерден ақша алып келген. Тергеу амалдарына сай, күдікті 2023–2025 жылдар аралығында «Family Health Clinic» ЖШС мен «Ким В.» ЖК клиникасында жұмыс істей отырып, пациенттерден варикоз ауруына жасалатын операциялардың МӘМС шеңберінде тегін жүргізілетіні туралы ақпаратты жасырған және көрсетілген қызметтер үшін төлемді өзінің банктік шоттарына қабылдап отырған.

«Сонымен қатар DamuMed жүйесіне пациенттерге тегін медициналық көмек көрсетілгені туралы мәліметтер енгізіліп, соның негізінде медициналық ұйымдар Әлеуметтік медициналық сақтандыру қорынан қаржыландыру алған», — деп хабарлады ҚМА.

Осылайша, бір медициналық қызмет үшін төлем екі рет жүргізілген: бір жағынан МӘМС қаражаты есебінен, екінші жағынан пациенттердің өз қаражаты арқылы. «Нәтижесінде күдікті 42 пациенттің 8 миллион теңгеден аса қаражатын заңсыз иемденген. Ал көрсетілген медициналық қызметтер үшін медициналық ұйымдарға Қор тарапынан 14,8 миллион теңгеден аса қаражат аударылған. Бұдан бөлек, оның қызметтік міндеттерін орындағаны үшін пациенттерден заңсыз ақшалай сыйақы алған деректері де анықталды», — делінген хабарламада. Күдіктіге қатысты елден кетпеу және тиісті мінез-құлық туралы қолхат түріндегі бұлтартпау шарасы қолданылды.

Дереккөз: 24.kz