Колумбияның Каука департаментіндегі Панамерикалық тасжолда болған жойқын жарылыстан 14 адам қаза тауып, 38-і жарақат алды. Зардап шеккендер арасында балалар да бар, деп хабарлайды Qazaqtoday ақпарат агенттігі.
Аймақ губернаторы бұл оқиғаны бейбіт тұрғындарға жасалған таңдаусыз шабуыл деп атады. Жарылыс демалыс күндері аймақтағы бірнеше муниципалитетті шарпыған зорлық-зомбылық толқынының бір бөлігі болды.
Колумбия президенті Густаво Петро бұл оқиғаны лаңкестік әрекет деп бағалады.
Арнайы қызметтің мәліметінше, шабуылды «Марлон» лақап атты содыр жоспарлаған. Ал жарылысты ұйымдастырды деп FARC (Колумбияның революциялық қарулы күштері) құрамындағы топ айыпталып отыр.
Елдегі күрделі жағдайға байланысты билік әскер мен құтқарушылардың іс-қимылын үйлестіру үшін шұғыл түрде ұлттық қауіпсіздік кеңесін шақырды.
Фото: Әлеуметтік желіден
