Түркиядағы жантүршігерлік жағдай: екі күнде екінші мектепте атыс болды

Түркияның Кахраманмараш қаласында сегізінші сынып оқушысы мектепте оқ атып, төрт адамның өмірін қиды. Қаза тапқандардың арасында бір мұғалім бар, деп хабарлайды Qazaqtoday ақпарат агенттігі.

Қайғылы оқиғадан тағы 20 адам зардап шегіп, оның төртеуінің жағдайы ауыр. Алдын ала мәлімет бойынша, жасөспірім бұрын полицияда жұмыс істеген әкесінің тапаншасын қолданған. Шабуылдан кейін оқушы өз-өзіне қол жұмсады.

Қазір оқиға орнында прокурорлар мен инспекторлар жұмыс істеп жатыр. Аймаққа елдің Ішкі істер және Білім министрлері ұшып барды.

Бұл – Түркияда соңғы екі тәулік ішінде тіркелген осыған ұқсас екінші оқиға. Бір күн бұрын Сиверек қаласында тағы бір жасөспірім 16 адамды жаралап, адамдарды кепілге алған соң өзін-өзі өлтірген болатын.

Фото: Әлеуметтік желіден