Kazakhmys Smelting өндірісті ұлғайтып, металлургиялық кешенді жаңғыртуда
Фото: Қазақмыс
2025 жылдың қорытындысы бойынша Kazakhmys Smelting металлургиялық дивизионы негізгі көрсеткіштердің тұрақты өсімін көрсетті. Тазартылмаған мыс өндірісі 13%-ға, күкірт қышқылын өндіру 11%-ға өсті (соңғы он жылдағы ең жоғары көрсеткіш), ал шихта өңдеу деңгейі тарихи максимумға жетті, деп хабарлайды QazaqToday.info ақпараттық порталы.
Осындай өсімге қол жеткізуге технологиялық үдерісті тұрақтандыру, жөндеу жұмысын жүргізу және өндірістік қуатты арттыру шаралары ықпал етті. 2026 жылы компания шикізатпен тұрақты түрде қамтамасыз етілген жағдайда өндірісті одан әрі ұлғайтуды жоспарлап отыр.
Өндіріс көлемі артқан сайын металлургиялық қуатты жаңғырту және кәсіпорындарды экологиялық талапқа сай жаңарту жұмысы жалғасуда.
Негізгі жобалардың бірі – Жезқазған мыс балқыту зауытында жаңа күкірт қышқылы кешенін салу. Оның іске қосылуы қалдық газдарды кәдеге жарату деңгейін едәуір арттырып, күкірт диоксиді шығарындыларын 90%-ға дейін төмендетеді, сондай-ақ қолданыстағы экологиялық талапқа сәйкестікті қамтамасыз етеді.
Жалпы, Kazakhmys Smelting компаниясының дамуы үш фактордың үйлесіміне негізделеді: өндірістік көрсеткіштің өсуі, металлургиялық қуатты техникалық тұрғыдан жаңғырту және экологиялық жүктемені кезең-кезеңімен төмендету. Металлургиялық қуатты жаңарту өндірістің тиімділігін арттыруға және оның экологиялық тұрақтылығын күшейтуге бағытталған. Компания ұзақ мерзімді бәсекеге қабілеттіліктің құралы ретінде жаңғыртуға басымдық беріп отыр.
