Жамбылдағы жоғары лауазымды шенеунік ҰҚК назарына ілікті: Не болып жатыр?

Ұлттық қауіпсіздік комитеті Жамбыл облысы бойынша Медициналық және фармацевтикалық бақылау комитеті департаментінің басшысы Айгүл Балғабаеваға қатысты істі тергеп жатыр, деп хабарлайды Qazaqtoday ақпарат агенттігі.

Бұл ақпаратты ҰҚК-ның баспасөз қызметі ресми түрде растады. Ведомствоның хабарлауынша, қазіргі уақытта шенеунікке қатысты сотқа дейінгі тергеу амалдары жүргізілуде.

«Сотқа дейінгі тергеу жүргізіліп жатыр. Қазақстанның Қылмыстық-процестік кодексінің 201-бабына («Сотқа дейінгі тергеу деректерін жария етуге жол бермеу») сәйкес басқа ақпаратты хабарлай алмаймыз», — деп жауап берді ҰҚК баспасөз қызметі.

Айгүл Балғабаева бұл қызметке 2024 жылдың 30 қыркүйегінде тағайындалған. Ол бұған дейін Денсаулық сақтау министрлігі Медициналық және фармацевтикалық бақылау комитетінде дәрілік заттар мен медициналық бұйымдардың бағасына мониторинг жүргізу басқармасының басшысы қызметін атқарған.

Фото: Әлеуметтік желіден