Аяз бен бұрқасын: Еліміздің үш қаласында ауа райы күрт өзгереді

«Қазгидромет» РМК синоптиктері Астана, Алматы және Шымкент қалаларында алдағы үш күнге арналған ауа райы болжамын ұсынды. Еліміздің басым бөлігінде ауа райы құбылмалы болады, деп хабарлайды Qazaqtoday ақпарат агенттігі.

Астана қаласы бойынша:

4 ақпанда елордада жауын-шашын болмайды, ауасы бұлтты болады. Оңтүстік-шығыстан соғатын желдің жылдамдығы күндіз секундына 9-14 метрге жетеді. Ауа температурасы түнде -18-20°С аяз болса, күндіз -3-5°С-қа дейін жылиды.

5 ақпанда күн бұлтты болып, күндіз қар аралас жаңбыр жауады, бұрқасын соғады. Оңтүстіктен соғатын желдің екпіні секундына 15-20 метрге дейін күшейеді. Температура түнде -4-6°С, ал күндіз -1…+1°С шамасында болады.

6 ақпанда да қар аралас жаңбыр жауып, бұрқасын мен көктайғақ күтіледі. Жел бағытын оңтүстік-батыстан солтүстік-батысқа өзгертіп, екпіні секундына 15-20 метрге жетеді. Ауа температурасы түнде де, күндіз де -1…+1°С-ты көрсетеді.

Алматы қаласы бойынша:

4 ақпанда ауыспалы бұлтты болады, түнде және таңертең қар аралас жаңбыр жаууы мүмкін. Тұман түсіп, жолдарда көктайғақ болады. Ауа температурасы түнде -1…+1°С, күндіз +6…+8°С жылы.

5 ақпанда жауын-шашын күтілмейді. Түнде және таңертең тұман түсуі ықтимал. Шығыстан соғатын желдің жылдамдығы секундына 3-8 метр болады. Температура түнде 0…-2°С, күндіз +8…+10°С-қа дейін көтеріледі.

6 ақпанда күн бұлттанып, күндіз қар аралас жаңбыр жауады. Түнде және таңертең тұман сақталады. Ауа температурасы түнде 0…+2°С, күндіз +6…+8°С болады.

Шымкент қаласы бойынша:

4 ақпанда күн ашық, жауын-шашынсыз өтеді. Оңтүстік-шығыстан секундына 8-13 метр жылдамдықпен жел соғады. Ауа температурасы түнде +2…+4°С, ал күндіз +15…+17°С-қа дейін жылиды.

5 ақпанда күндіз жаңбыр жауады. Жел оңтүстік-шығыстан оңтүстік-батысқа ауысады. Температура түнде +4…+6°С, күндіз +15…+17°С жылы болады.

6 ақпанда мезгіл-мезгіл жаңбыр жауады. Оңтүстік-батыстан соғатын желдің екпіні секундына 15-20 метрге жетуі мүмкін. Ауа температурасы түнде де, күндіз де +2…+4°С-ты құрайды.