Мәжіліс депутаты Үнзила Шапақ танымал Roblox ойын платформасының қазақстандық балаларға төндіретін ықтимал қаупін бағалауды талап етті. Оның айтуынша, сервистің негізгі аудиториясы – кәмелетке толмағандар, ал олардың психикалық және физикалық денсаулығына төнетін қауіп ата-аналар мен сарапшыларды қатты алаңдатып отыр, деп хабарлайды Qazaqtoday ақпарат агенттігі.
Amanat фракциясының мүшесі депутаттық сауалында бұл платформаның виртуалды тәуелділікке, агрессивті мінез-құлыққа итермелейтінін, сондай-ақ балалардың қалаусыз контентке тап болу қаупін атап өтті. Депутат әсіресе ойын чаттарын балалармен байланыс орнату үшін пайдаланатын алаяқтар мен педофилдердің белсенділігіне назар аударды.
«Компания қауіпсіз орта құрдық деп сендіргенімен, күн сайынғы орасан зор хабарламалар ағынын толық бақылау іс жүзінде мүмкін емес. Бұл – балаларымыз үшін үлкен қатер», — деп атап өтті Үнзила Шапақ.
Осыған байланысты депутат Үкіметтен Roblox ойынының балаларға әсерін жан-жақты бағалауды, қажет болса қосымша бақылау шараларын енгізу мүмкіндігін қарастыруды және осыған дейін онлайн ойын платформаларына қатысты тіркелген құқық бұзушылықтар туралы нақты деректерді ұсынуды сұрады.
Фото: Әлеуметтік желіден
