Арман Қырықбаев Франция елшісімен мәдени ынтымақтастықты талқылады

Сурет: inbusiness.kz

Қазақстанның Мәдениет және ақпарат министрі Арман Қырықбаев Францияның Қазақстандағы Төтенше және Өкілетті Елшісі Сильван Гиоге мырзамен кездесіп, мәдени-гуманитарлық ынтымақтастықтың жаңа мүмкіндіктері мен бірлескен бастамаларды жүзеге асыру перспективаларын талқылады. Кездесуде бірлескен киноөндіріс, фильмдерді қазақ және француз тілдеріне аудару, мұражай жобалары және мәдени мұраны сақтау мәселелері басты тақырыпқа айналды.

Бұл туралы Qazaqtoday.info сайты хабарлайды.

Тараптар мәдениет және өнер саласындағы өзара іс-қимылды кеңейтуге баса назар аударды. «Келіссөздер барысында бірлескен көрмелер, театр гастрольдері және кәсіби алмасуларды ұйымдастыру перспективалары қарастырылды. Бұл бағыттар мәдени байланыстарды нығайтуға, шығармашылық ұжымдар арасындағы байланысты кеңейтуге және екі елдің бейінді ұйымдарының ынтымақтастығын дамытуға ықпал етуі тиіс», — деп хабарлады Қазақстан Республикасының Мәдениет және ақпарат министрлігі.

Арман Қырықбаев қазақстан-француз қатынастарының жоғары серпінін және мәдени-гуманитарлық әріптестіктің дәйекті нығаюын атап өтті. «Кездесуде мұражай саласы мен кинематографияға ерекше назар аударылды. Атап айтқанда, фильмдерді бірлесіп өндіру, сондай-ақ оларды тілдік бейімдеу мүмкіндіктері талқыланды. Француз киноленталарын қазақ тіліне және қазақстандық фильмдерді француз тіліне дубляждау туралы сөз болып отыр», — делінген ведомство хабарламасында.

Мұндай жобалар ұлттық кинематографияның аудиториясын кеңейтіп, екі елдің мәдени контентін қолжетімді ете түсуге және режиссерлер, продюсерлер мен киноиндустрияның басқа да өкілдерінің ынтымақтастығы үшін қосымша мүмкіндіктер жасауға септігін тигізуі мүмкін.

Келіссөздердің тағы бір тақырыбы — мәдени мұраны сақтау болды. Франция елшісі Қазақстанның мәдени мұраны қорғау жөніндегі халықаралық ALIPH альянсына кіруге қызығушылық танытты. Арман Қырықбаев бұл саладағы халықаралық өзара іс-қимылдың маңыздылығын атап өтті. Оның айтуынша, ұйымның көпжақты мәдени ынтымақтастықты дамытудағы маңызды рөлін ескере отырып, Қазақстанның ықтимал қатысуы мәселесі ерекше назар аударуды қажет етеді және жан-жақты зерделеуді талап етеді.

Кездесу қорытындысы бойынша тараптар мәдени-гуманитарлық байланыстарды одан әрі нығайтуға және екіжақты әріптестікті дамытуға дайындықтарын растады. Перспективалық бағыттар қатарында бірлескен мәдени жобалар, мұражайлар мен кинематографистердің ынтымақтастығы, сондай-ақ тарихи мұраны сақтау жөніндегі халықаралық бастамалар қала береді.