Шу көпсалалы аудандық орталық ауруханасында жүкті әйелдің қайтыс болуына байланысты тергеу жүргізілуде, деп жазады Qazaq.today ақпарат порталы. 

Олардың айтуынша, 5 наурызда жүкті әйел 34-ші аптада ауруханаға жатқызылған. 9 наурызда жағдайы күрт нашарлап, комаға түсіп, 10 наурызда дәрігерлер құрсақтағы шетінеген нәрестені ота арқылы алған. Содан бері ол жансақтау бөлімінде жатқан. Кейіннен әйелін іздеген күйеуі оның денесін аурухананың техникалық бөлмелерінің бірінен тауып алған деген ақпарат тарады.

Шу қалалық көпсалалы ауруханасының ресми мәліметінше, науқас 22 наурызда жедел жүрек-қан тамырлары жеткіліксіздігінен қайтыс болған.

«Ана өліміне байланысты тергеу басталды. Жамбыл облыстық денсаулық сақтау басқармасы арнайы жұмыс тобын құрды. Сонымен қатар, Денсаулық сақтау министрлігі Медициналық және фармацевтикалық бақылау комитетінің Жамбыл облысы бойынша департаменті тексеру жүргізіп жатыр. Сараптама нәтижелері кейін жарияланады», — деп хабарлады басқарма өкілдері.

Сондай-ақ, Жамбыл облыстық полиция департаменті Қылмыстық кодекстің 317-бабының 2 және 3-бөліктері бойынша (медицина қызметкерінің кәсіби міндеттерін тиісінше орындамауы салдарынан денсаулыққа ауыр зиян келтіру немесе өлімге әкелу) сотқа дейінгі тергеу амалдарын қолға алды.

Қажетті сараптама жасау үшін мәйіт Тараз қаласына жіберілді.