Шымкент тұрғыны көлік нөмірін матамен жасырып, қамауға алынды
Түркістан облысында 25 жастағы Шымкент тұрғыны көлік нөмірін матамен жасырып, бес тәулік әкімшілік қамауға алынып, бір жылға жүргізу құқығынан айырылды.
Фото: пресс-служба МВД РК
Түркістан облысында полицейлер көліктің мемлекеттік нөмірін әдейі матамен жапқан жүргізушіні ұстады. Сот бұзушыға әкімшілік қамау жазасын тағайындап, көлік жүргізу құқығынан айырды.
Бұл туралы Qazaqtoday.info сайты хабарлайды.
Құқық бұзушылық Шымкент – Самара автожолында жедел басқару орталығының қызметкерлерімен тіркелді. Сарыағаштан Түркістанға келе жатқан Toyota көлігін 25 жастағы Шымкент тұрғыны басқарған.
Іс материалдары сот орындарына жіберілді. Сот шешімімен жүргізуші көлік нөмірлерін қасақана жасырғаны үшін кінәлі деп танылды.
«Оған бес тәулік әкімшілік қамау және бір жылға көлік құралдарын басқару құқығынан айыру жазасы тағайындалды», — деді құқық қорғау органдарының баспасөз қызметі.
Сонымен қатар, ер адам бұған дейін де жол полициясының назарына іліккені анықталды: ағымдағы жылдың басынан бері ол жол қозғалысы ережелерін алты түрлі бұзған. Полицейлер жолдардағы қауіпсіздікті қамтамасыз ету үшін осындай құқық бұзушылықтарды анықтау жұмыстарын жалғастыруда.
Алматы облысында бұған дейін де автолихачтарға қатаң шаралар қолданылған – апаттық жағдай туғызған жол жарыстары мен кортеждерге қатысушылар әкімшілік қамауға тартылды. Полицейлер мұндай құқық бұзушылықтар үшін құқықтан айыруға дейінгі қатаң жауапкершілік қарастырылғанын еске салады.
