Майкл Джексонның Thriller клипіндегі қызыл күртешесі аукционға қойылады
Майкл Джексонның Thriller клипіндегі қызыл күртешесі аукционға қойылады. Бағасы 10 млн доллардан асуы мүмкін. Сондай-ақ ақ қолғап пен лоферлер сатылады.
Сурет: inbusiness.kz
Майкл Джексонның «Thriller» бейнеклипінде киген қызыл күртешесі аукционға шығарылады. Бастапқы бағасы 10 миллион доллардан асуы мүмкін деп күтілуде.
Бұл туралы Qazaqtoday.info сайты хабарлайды.
Бұл күртеше сауда-саттықтың басты лотына айналмақ. Оның құнын ерекше арттыратын нәрсе — әншінің өз қолымен қалдырған жазулары: ішкі жағында Буш пен Денниске арнау жазылған, ал жеңінде Джексонның қолтаңбасы бар.
Аты аңызға айналған бейнеклипті түсіру үшін осындай екі күртеше тігілген. Бірінші данасы 2011 жылы 1,8 миллион долларға сатылған. Оны америкалық кәсіпкер Милтон Веррет сатып алған.
Аукционда күртешемен қатар әншінің маржандармен безендірілген ақ қолғабы, сондай-ақ 1983 жылы «Motown 25» бағдарламасында әйгілі «ай серуенін» орындаған лоферлері де қойылады.
