Шерзаттың өлімінен кейін қызметінен босатылған вице-министр басшылық қызметке келді

Талғардағы жасөспірім Шерзат Полаттың өлімінен кейінгі шудан соң қызметінен босатылған бұрынғы вице-министр Айдос Рысбаев көлік полициясы басқармасының бастығы қызметіне тағайындалды, деп хабарлайды Qazaq Today ақпарат порталы.

«Айдос Рысбаевтың басқарушылық тәжірибесі бар, ол бұған дейін ішкі істер министрінің орынбасары қызметін атқарған. Рысбаевта бөлімшені тиімді басқаруға қажетті қасиеттер бар», – делінген министрлік хабарламасында.

Айта кетейік, Рысбаев ішкі істер министрінің орынбасары қызметін бар болғаны 11 ай атқарып, 18 қазанда босатылды. Ол қауіпсіздік күштеріндегі жаппай кадрлық ауыс-түйіс кезінде жұмыстан шығарылғандардың бірі болды.

Айдос Рысбаевтың кетуі Талғардағы Шерзат Полаттың өліміне қатысты жанжалмен тұспа-тұс келді.