Пайда табу: «Қазақтелекомның» филиал басшылары ғимаратты қасақана арзан бағаға сатып жіберген
Фото: «Қазақтелеком» АҚ баспасөз қызметі
Сыбайлас жемқорлыққа қарсы қызметтің Жамбыл облысы бойынша департаменті аса ірі көлемде жемқорлық фактісін анықтады, деп хабарлайды Qazaq.today.
Ұлттық компанияның жылжымайтын мүлік портфелін басқаруға жауапты бөлімше болып табылатын «Қазақтелеком» АҚ филиалы – сервистік фабрикасының лауазымды тұлғаларына қатысты өкілеттіктерді теріс пайдалану фактісі бойынша қылмыстық істі тергеуде.
Филиалдың бұрынғы бас директоры мен бірқатар қызметкерлері мемлекет мүддесіне қайшы және кәсіпкер үшін пайда табу мақсатында оған Тараз қаласындағы Қоғамның әкімшілік ғимаратын көрінеу төмен бағамен сатқан деп күдіктенеді.
«Олардың заңсыз әрекеттерінің нәтижесінде мемлекетке 450 млн теңгеден астам сомаға материалдық залал келтірілді. Келтірілген зиянды өтеу жөніндегі қамтамасыз ету шаралары ретінде жоғарыда аталған нысанға тыйым салынды», — деп хабарлады ведомствоның баспасөз қызметі.
