Туғанына 1 күн болған: Семейде шақалақты қоқыс жәшігіне салып өртеп жіберген
Семейде шағын аудандардың бірінде бүгін сағат 12:00 шамасында жанып жатқан қоқыс жәшігінен нәресте табылды, деп хабарлайды Qazaq.today.
Бұл туралы ақпарат Instagram-дағы oo_osa_semey__vko парашасына жарияланды. Ондағы мәліметке сүйенсек, шақалақ шұғыл түрде ауруханаға жеткізілген.
Алайда одан кейін балалар омбудсмені Динара Зәкиева нәрестенің жансақтау бөлімінде көз жұмғанын мәлім етті.
— Қыз бала сағат 19:40-та қайтыс болды. Оның денесінің 80 пайызын күйік шалған. Бала құқығы жөніндегі уәкілдің өңірлік өкілі және облыс прокуратурасымен байланыста отырмын, — деп жазды Динара Зәкиева өзінің Instagram-дағы парақшасына.
Бұл ретте нәрестенің дүниеге келгеніне шамамен небәрі 1 күн болған. Аталған факті бойынша сотқа дейінгі тергеу басталды.
